Басты бетШипажайдың аспазы Шолпан Жылқышиева Алғыс хатпен марапатталды

Шипажайдың аспазы Шолпан Жылқышиева Алғыс хатпен марапатталды

Шипажайдың аспазы Шолпан Жылқышиева Алғыс хатпен марапатталды

Шипажайдың білікті аспазы Шолпан Жылқышиева Қазақстан Республикасы Президенті  Іс Басқарушысы Асат Нұрпейісовтің  Алғыс  хатына ие болды. Ол Шолпан ханымның кәсібилігін, өз ісіне адалдығын және жұмысқа деген жауапкершілігін ерекше атап өтті.

Бұл марапат Шолпан Жылқышиева үшін зор құрмет пен қуаныш болды. «Бұл мен үшін үлкен абырой, ұжымымыз үшін мақтаныш. Марапат бізге шабыт пен жігер сыйлады. Біз демалушыларға сапалы әрі дәмді тағам ұсыну жолында бірлесе еңбек етіп келеміз», – дейді ол.

Аспаздыққа деген қызығушылық Шолпанның бала кезінен басталған. Уақыт өте келе бұл әуестік  сүйікті мамандығына айналды. Арнайы аспаздық білім алып, тағамтану саласында жұмыс істеген соң, ол шипажайға келіп қызметін жалғастырды. Оның айтуынша, бұл жерде тек дәмді тамақ әзірлеу ғана емес, тағамның пайдасы, құрамы мен диеталық талаптарды ескеру маңызды.

Аспаз үшін ұлттық асхананың орны ерекше. Шолпан Жылқышиева ата-бабадан мирас болып келе жатқан дәстүрлі тағамдарды сақтай отырып, оларды заманауи дұрыс тамақтану талаптарына бейімдеуге тырысады.

Шипажай асханасының тағамдарын дәмді әрі пайдалы ететін не нәрсе? Шолпан Жылқышиеваның айтуынша, мұның сыры – азық-түліктің сапасында, ингредиенттердің үйлесімділігінде және өз ісіне деген махаббатта жатыр.

«Біз тек балғын әрі табиғи өнімдерді қолданамыз, көкөністер мен көк шөптерді көп пайдаланамыз, қуырылған тағамдарды азайтуға тырысамыз. Әр демалушының қажеттілігін ескереміз – біреуге диеталық тағам қажет болса, енді біреуге белгілі бір калориялы мәзір керек. Сондықтан біздің мақсат – тек тойдыру емес, тағамды пайдалы, әрі әркімнің талғамына сай ету», – дейді ол.